Najljepšoj Jugoslovenki život počeo kao bajka, a završio kao tragedija

Na izboru se, navodno, našla slučajno. U vrijeme kada se organizovao izbor za Miss Jugoslavije, ženski nedeljnik “Bazar” preuzeo je organizaciju. Međutim, glavna urednica nije bila zadovoljna prijavljenim kandidatkinjama i krenula je u potragu za anonimnim djevojkama. Srela je Nikicu Marinović, tada još uvijek maloljetnu učenicu dubrovačke Ekonomske škole. Jedva je uspjela da ubijedi njene konzervativne roditelje da je puste da učestvuje, a upravo je ona ostavila za sobom sve druge jugoslovenske ljepotice, a onda i najljepše iz cijelog svijeta, piše “24sata.rs“…

Nikica se poslije trijumfa na izboru za Miss svijeta preselila u Beograd. Prepričavalo se kako je odbila slavnog filmskog producenta Dina de Laurentisa, koji joj je nudio ispunjenje holivudskog sna, objasnivši mu da nema talenta za glumu. Njeno lice je i godinama poslije toga krasilo naslovnice, dijelila je čitateljkama savjete o modi i ljepoti, a ljepotom, osmijehom, skromnošću je zavodila svakoga ko bi je sreo.

Ipak, njeno srce osvojio je beogradski književnik i reditelj Vuk Vučo s kojim je dobila sina Đorđa. Taj brak je trajao manje od pet godina, a po razvodu, ponovo su je opsjedali udvarači. Po drugi put, Nikica je sudbonosno “da” izrekla čuvenom reditelju Zdravku Šotri, kojem je rodila sina Marka. Taj brak je potrajao malo duže, ali i ta ljubav se završila 1980. godine.

Nikica je vodila butik u Knez Mihailovoj i mnogi su dolazili samo da bi je vidjeli.

A onda joj se, u jednom momentu izgubio trag. Pričalo se da se bori s depresijom. Živjela je daleko od očiju javnosti, prekinula je i kontakte sa najbližim prijateljima.

U novembru 2008. ponovo se našla na naslovnicama – iz najstrašnijeg mogućeg razloga.

Nikica je popila smrtonosnu dozu tableta za spavanje ne ostavivši za sobom oproštajno pismo ni poruku iz koje bi se moglo zaključiti zašto je izvršila samoubistvo. Imala je 61 godinu.